Yumşaq toxumaların və limfa düyünlərinin ultrasəs müayinəsi (USM)

Yumşaq toxumaların və limfa düyünlərinin ultrasəs müayinəsi (USM)

Yumşaq toxumaların və limfa düyünlərinin ultrasəs müayinəsi dəri altında və səthi toxumalarda hiss edilən və ya klinik müayinə zamanı aşkarlanan dəyişikliklərin qiymətləndirilməsi üçün istifadə olunan qeyri-invaziv görüntüləmə üsuludur. USM vasitəsilə dəyişikliklərin yerləşməsi, ölçüsü, quruluşu və ətraf toxumalarla münasibəti qiymətləndirilə bilər. Müayinə lipoma, kista, lokal v' ya diffuz maye toplanması və digər yumşaq toxuma dəyişikliklərinin araşdırılmasına, həmçinin boyun, qoltuqaltı, qasıq və digər səthi nahiyələrdə limfa düyünlərinin ölçü, forma və digər ultrasəs xüsusiyyətlərinin qiymətləndirilməsinə kömək edir. Ehtiyac olduqda Doppler rejimi ilə dəyişikliklərin qanlanması da araşdırıla bilər. Ultrasəs müayinəsində ionlaşdırıcı şüalanmadan istifadə edilmir. USM aşkarlanan dəyişiklik haqqında mühüm məlumat versə də, onun xarakterini bütün hallarda qəti müəyyən etmir. Klinik vəziyyətdən asılı olaraq əlavə görüntüləmə, laborator müayinələr və ya biopsiya tələb oluna bilər.

Nə zaman müraciət etməli?

• Dəri altında hiss edilən kütlə və ya bərklik
• Səthi yumşaq toxumalarda şişkinlik
• Boyun, qoltuqaltı və ya qasıqda böyümüş limfa düyünləri
• Lipoma və ya kistaya şübhə
• Maye toplanması və ya digər yumşaq toxuma dəyişikliklərinə şübhə
• Ağrılı və ya həssas səthi kütlələrin qiymətləndirilməsi
• Əvvəllər aşkarlanmış yumşaq toxuma dəyişikliklərinin dinamik izlənməsi
• Əvvəllər aşkarlanmış limfa düyünlərinin müqayisəli qiymətləndirilməsi
• Həkim tövsiyəsi ilə səthi yumşaq toxuma və limfa düyünlərinin qiymətləndirilməsi

Kimə lazımdır?

Dəri altında yeni yaranmış və ya əvvəldən mövcud olan kütlə, bərklik və ya şişkinlik hiss edən; boyun, qoltuqaltı, qasıq və digər nahiyələrdə böyümüş limfa düyünləri aşkarlanan; lipoma, kista və digər yumşaq toxuma dəyişikliklərindən şübhələnilən və ya əvvəldən məlum dəyişikliklərin izlənməsi tələb olunan pasiyentlərə həkim tərəfindən tövsiyə edilə bilər.

Müayinə necə aparılır?

Pasiyent müayinə ediləcək nahiyəyə uyğun vəziyyətdə yerləşdirilir. Dəriyə xüsusi ultrasəs geli çəkilir və həkim yüksək tezlikli ultrasəs probu vasitəsilə yumşaq toxumaları və ya limfa düyünlərini müxtəlif proyeksiyalarda qiymətləndirir. Aşkarlanan dəyişikliklərin ölçüsü, quruluşu, yerləşməsi və ətraf toxumalarla münasibəti araşdırılır. Ehtiyac olduqda Doppler rejimindən istifadə edilərək qanlanma xüsusiyyətləri də qiymətləndirilə bilər.

Hazırlıq

Əksər yumşaq toxuma və limfa düyünləri USM-si üçün xüsusi hazırlıq tələb olunmur. Müayinə ediləcək nahiyəyə rahat çıxış verən geyim seçilməsi tövsiyə olunur. Əvvəlki USM, KT, MRT, biopsiya və digər müvafiq nəticələriniz varsa, müqayisəli qiymətləndirmə üçün özünüzlə gətirməyiniz faydalıdır.

Nəticə necə verilir?

Müayinə zamanı əldə edilən görüntülər qiymətləndirilir və nəticə yazılı rəy şəklində təqdim olunur. Aşkarlanan dəyişikliklərin yerləşməsi, ölçüsü və əsas ultrasəs xüsusiyyətləri qeyd edilir. Limfa düyünləri qiymətləndirildikdə onların ölçüsü, forması və görünən struktur xüsusiyyətləri təsvir edilə bilər. Nəticədən asılı olaraq dinamik müşahidə, müvafiq mütəxəssis konsultasiyası, əlavə görüntüləmə və ya biopsiya tövsiyə oluna bilər.

Təhlükəsizlik və məhdudiyyətlər

Ultrasəs müayinəsində ionlaşdırıcı şüalanmadan istifadə edilmir və müayinə qeyri-invazivdir. USM yumşaq toxuma və limfa düyünlərinin struktur xüsusiyyətlərini qiymətləndirməyə imkan verir, lakin görüntüyə əsasən bütün dəyişikliklərin səbəbini və ya xoşxassəli-bədxassəli xarakterini qəti müəyyən etmək mümkün deyil. Klinik vəziyyətdən asılı olaraq laborator analizlər, KT, MRT və ya biopsiya tələb oluna bilər.

Nə vaxt təcili müraciət etməli?

Sürətlə artan və güclü ağrı verən şişkinlik, geniş yayılan qızartı və istilik artımı, yüksək hərarət və ümumi vəziyyətin pisləşməsi olduqda planlı USM qəbulunu gözləmədən tibbi qiymətləndirmə üçün müraciət edin. Boyun nahiyəsində sürətlə artan şişkinlik nəfəs alma və ya udmada çətinlik yaradırsa, təcili tibbi yardım tələb oluna bilər.

Müayinə üzrə suallar